Fjöldi fólks fylgdist með blaðamannafundi um hvarf Birnu Brjánsdóttir í Kringlunni í dag. Búið var að koma fyrir flatskjá á efri hæð verslunarmiðstöðvarinnar og gátu vegfarendur fylgst með gangi mála.
Birna Brjánsdóttir fannst látin í dag. Það var áhöfn þyrlu Landhelgisgæslunnar sem kom auga á lík í hafinu úti fyrir Selvogsvita. Lögreglan telur að um Birnu sé að ræða en kennslanefnd á eftir að rannsaka það frekar. Umfangsmiklar aðgerðir voru af hálfu lögreglunnar á höfuðborgarsvæðinu við Selvogsvita í Selvogi síðdegis í dag.
Vitinn er skammt austan við húsaþyrpinguna í Selvogi í átt að Þorlákshöfn. Er svæðið meðal þeirra staða þar sem björgunarsveitir hafa leitað Birnu Brjánsdóttur í dag. 725 björgunarsveitarmenn hafa komið að leitinni að Birnu síðustu daga. Enn verður leitað vísbendinga á svæðinu í grennd við staðinn þar sem lík hennar fannst í dag.