Maður sem grunaður er um að hafa orðið valdur að dauða Birnu Brjánsdóttur og hefur setið í gæsluvarðhaldi síðustu fjórar vikurnar hefur verið úrskurðaður í áframhaldandi gæsluvarðhald í tvær vikur vegna rannsóknarhagsmuna. Þetta var niðurstaða dómara við Héraðsdóm Reykjaness í dag.
Maðurinn hefur setið í einangrun á Litla Hrauni í fjórar vikur. Lögregluyfirvöld og ákæruvald hafa tólf vikur frá handtöku til að gefa út ákæru eigi viðkomandi að sitja í gæsluvarðhaldi fram að dómi.
Jón HB Snorrason, aðstoðarlögreglustjóri á ákærusviði, staðfesti að maðurinn muni áfram sitja í einangrun. Hann vildi engu svara um hvort játning lægi fyrir í málinu né nánar hvernig rannsókn gengi.
Grímur Grímsson, yfirlögregluþjónn, sagði í samtali við mbl.is í gær að maðurinn hefði ekki játað sök við yfirheyrslur en hann vildi ekki tjá sig frekar um það sem fram hefði komið við yfirheyrslur.
Niðurstöður úr rannsóknum á þeim sýnum sem send voru erlendis til greiningar hafa enn ekki borist. Mbl.is hafði eftir Grími á mánudag að hann vonaðist til þess að þær skiluðu sér á næstu dögum. Tæknideild lögreglu sjái um þau samskipti og samkvæmt þeirra upplýsingar séu þær rúmu þrjár vikur sem nú eru frá því að sýnin voru send utan innan eðlilegs vinnslutíma.