Kjarasamningur sjómanna, sem samninganefndir þeirra og SFS náðu saman um aðfaranótt laugardags, hefur verið samþykktur í atkvæðagreiðslu.
Þar með lýkur verkfalli sjómanna, sem staðið hafði yfir í tæpar tíu vikur.
2.214 manns voru á kjörskrá. 1.189 greiddu atkvæði, en þau féllu þannig að 623 voru fylgjandi samningnum, en 558 voru mótfallnir. Átta kjörseðlar voru þá auðir og ógildir.
52,4% þeirra sem greiddu atkvæði samþykktu því samninginn, en 46,9% greiddu atkvæði gegn honum.
Varaformaður Sjómannasambandsins: „Afskaplega feginn“
Framkvæmdastjóri Vinnslustöðvarinnar: Halda úr höfn í kvöld
Framkvæmdastjóri SFS: „Mikill léttir“
Forstjóri Síldarvinnslunnar: „Nú fara menn bara á sjó“
Formaður Sjómannasambandsins: „Tæpt en þetta hafðist“
Skiptar skoðanir höfðu verið um samninginn, en kjörsókn var allt frá 10% upp í 70%. Flestir voru þó sammála um að tvísýnt yrði um niðurstöðuna og að tæpt yrði á munum, á hvorn veginn sem færi.
Konráð Þorsteinn Alfreðsson, varaformaður Sjómannasambands Íslands, sagðist halda að menn kynnu að meta samninginn. Áður hafði hann sagt, í samtali við mbl.is, að það væri glapræði að fella samninginn.
Enn fremur bjóst hann fastlega við því að Þorgerður Katrín Gunnarsdóttir sjávarútvegsráðherra myndi leggja fram frumvarp um lög á sjómenn, yrði samningurinn felldur. Deiluaðilar myndu þá líklega ekki koma saman á ný, færi svo.
„Það er ekkert til að hittast yfir. Við vorum komin alveg í botn í þessu máli. Það er ekkert meira í boði,“ sagði Konráð þá.