Búið er að opna Reykjanesbraut á ný fyrir umferð. Henni var lokað í báðar áttir á níunda tímanum vegna umferðarslyss sem varð skammt frá álverinu í Straumsvík.
Tveir bílar lentu í hörðum árekstri á veginum. Fjórir voru í bílunum og voru þeir allir fluttir á slysadeild Landspítalans til aðhlynningar. Þrír þeirra voru slasaðir, misalvarlega.
Ekki hafa fengist frekari upplýsingar um meiðsl þeirra í kvöld.
Nokkurn tíma tók að hreinsa veginn eftir slysið þar sem kalla þurfti út teymi til að hreinsa olíu sem lak á vettvangi.
Báðir bílarnir skemmdust mikið og eru óökufærir.