200 mílur | Morgunblaðið | 24.4.2017 | 7:57 | Uppfært 9:22

Margir komnir í land eftir verkfall

Línubátur á sjó. mbl.is/Ómar Óskarsson

Magnús Heimir Jónasson

mhj@mbl.is

Setja bókamerki

Snúa ekki aftur

Laun hafa lækkað vegna styrkingar krónunnar.
Fiskverð helst lágt á markaði eftir verkfall.
Næga vinnu að fá í landi.
Mannekla mest í Grindavík og á Snæfellsnesi.

Valmundur Valmundsson, formaður Sjómannasambandsins, segir að margir sjómenn hafi ekki snúið aftur á sjó að verkfalli loknu.

„Það eru bara lægri tekjur núna en áður,“ segir Valmundur í umfjöllun um mál þetta í Morgunblaðinu í dag. „Gengið er búið að lækka um 30% á einu ári og það bara helst í hendur við tekjur sjómanna og útgerðarmanna.“

Valmundur bætir við að áframhaldandi lágt fiskverð á markaði hjálpi heldur ekki til.

Grindavík og Snæfellsnes

Þá segir hann að ekki liggi fyrir nákvæmar tölur um hversu margir sjómenn hafi ekki snúið aftur til starfa á sjó en hann segir að vandamálið sé víða um land. „Við höfum ekki tölur um hversu margir þetta eru. Ég get ekki gert mér grein fyrir því. Við heyrum þetta alls staðar. Þetta er ekki 30-40% eða neitt þannig, en þetta er einhver hópur,“ segir Valmundur.

„Við heyrum að þetta sé mest í Grindavík og þar sem er línuútgerð, t.d á Snæfellsnesi.“

Hann segir að línubátarnir séu í mesta vandanum en línubátar landa í eigin vinnslur, þar sem fiskverðið er lægra. „Svo eru margir um borð og þá eru tekjurnar bara ekki nægilega góðar.“

Spurður hvort að bátar hafi ekki getað siglt út vegna manneklu segir hann að það hafi ekki gerst.

„Það er ekki komið þannig enn þá en það gengur illa að manna línubátana.“