Sjóvá Kvennahlaup ÍSÍ fór fram í 28. sinn í dag, sunnudaginn 18. júní. Góð þátttaka var í hlaupinu og talið er að um tíu þúsund konur hafi tekið þátt á yfir 80 stöðum um allt land og víða erlendis. Um tvö þúsund konur hlupu í Garðabæ, þúsund í Mosfellsbæ, 200 á Akureyri og rúmlega 200 í Reykjanesbæ. Boðið var upp á mismunandi vegalengdir, allt frá 900 metrum upp í tíu kílómetra hlaup. Þetta kemur fram í tilkynningu.
Sólveig Alda Pétursdóttir, sem er fædd 1925 var elsti þátttakandi hlaupsins í Garðabæ og hlaut viðurkenningu Garðbæinga. Þeir hafa haft þann sið að veita þeim elsta viðurkenningu. Sólveig Alda fékk afhentan grip sem ÍSÍ og Stjarnan gáfu til minningar um Lovísu Einarsdóttir, íþróttakennara og upphafskonu Kvennahlaupsins. Mosfellingar gáfu að vanda öllum langömmum rós þegar þær komu í mark. Þetta kemur jafnframt fram í tilkynningu.
Öldrunarheimili víðs vegar um land hafa boðið heimilisfólki sínu að taka þátt í Kvennahlaupinu í vikunni sem er að líða. Þess má geta að Kristín Kristvarðsdóttir, sem er 103 ára, var elsti þátttakandinn í hlaupinu sem fram fór á föstudaginn á Hrafnistu í Hafnarfirði.