Kúrdísku Sabre-fjölskyldunni verður vísað úr landi eftir fjóra daga; þriðjudaginn 18. júlí næstkomandi. Tæpt ár er síðan fjölskyldan kom hingað til lands til að sækja um hæli, eftir að hafa verið á flótta í ár. Á mánudag var þeim tilkynnt að umsókn þeirra hefði verið hafnað. Fjölskyldan segist óttast að verða vísað til Íraks, þar sem þeirra bíði hræðileg örlög.
Frá þessu greinir Shay Chan Hodges á vef Huffington Post, en hún er systir listakonunnar Michelle Bird sem stóð fyrir undirskriftasöfnun fyrir fjölskylduna fyrr á árinu. Þar var skorað á formann kærunefndar útlendingamála að veita Sabre-fjölskyldunni hæli á Íslandi, en tæplega 1.300 skrifuðu undir.
Á mánudag var fjölskyldunni tjáð að þeim yrði vísað úr landi á grundvelli Dyflinnar-reglugerðarinnar, þar sem þau höfðu áður sótt um hæli í Noregi. Tveimur dögum síðar fengu þau upplýsingar um að búið væri að ákveða að þeim yrði vísað úr landi 18. júlí. Ekkert meira væri hægt að gera fyrir þau hér á landi.
„Búið er að kveða upp úrskurðinn á Íslandi, en enn er svo mikið í húfi. Við höfum þrjá virka daga til að hjálpa vinum okkar. Á meðan klukkan tifar höldum við áfram að skoða möguleika sem gætu hjálpað fjölskyldunni þegar þau koma til Noregs,“ skrifar Hodges.
„Hvað mun gerast þegar þau koma til Noregs? Getur einhver hitt þau þar? Eru þau undir einhverjum takmörkum? Eða mega þau vera hjá vinum í Noregi? Hvernig geta þau áfrýjað dómum sínum í Noregi? Hversu mikinn tíma hafa þau í Noregi? Geta þau sótt um búsetu annars staðar? Geta þau tekið flugvél til annars lands þegar þau eru í Noregi?“ spyr hún í pistlinum.
Fjölskyldan hefur áður fengið tvær synjanir. Útlendingastofnun hafnaði því að taka málið til efnislegrar skoðunar og kærunefnd útlendingamála tók undir þá niðurstöðu. Ástæðan er að þau koma frá Noregi og ræður Dyflinnarreglugerðin því för. Þar fengu þau neitun um alþjóðlega vernd en ákvörðunin byggðist á því að í Írak vær öruggt svæði. Í úrskurði Útlendingastofnunar á Íslandi segir að fjölskyldan skuli fara til Noregs til að fá réttláta málsmeðferð. Sema Erla Serdar, formaður Solaris, hjálparsamtaka fyrir hælisleitendur, sagði í samtali við mbl.is í apríl að það væri ólíkleg niðurstaða.
„Ef þau verða send til Noregs fá þau jafnvel ekki að fara inn í landið, þau gætu verið send beint til Íraks. Norsk yfirvöld eru hreinlega hætt að veita Írökum vernd í landinu,“ sagði Sema.
Myndband af fjölskyldunni var birt í vikunni, en þar segja þau frá raunum sínum í Írak og hversu vel þeim hefur liðið á Íslandi.
Fjölskyldan samanstendur af fjölskylduföðurnum Bejan, eiginkonu hans Zöru Bejan og dætrunum Zhala Bejan sem er sautján ára gömul og Zhakau Bejan sem er tvítug. Fjölskyldan býr í Hafnarfirði þar sem stúlkurnar ganga í skóla.
Bejan starfaði sem lögreglumaður í Írak, en þurfti að flýja land með fjölskyldu sína vegna hættu sem kom upp í vinnu hans. Fyrir það hafði fjölskyldan lifað venjulegu fjölskyldulífi í Írak.
Zhala segir í myndbandinu að hún hafi verið á leið í skólann þegar pabbi hennar sagði henni að pakka ofan í tösku og yfirgefa allt því þau væru í hættu og þyrftu að flýja land. Í myndbandinu segist Bejan hafa lifað í ótta við að dætrum hans yrði rænt, þeim nauðgað og þær jafnvel drepnar. Ástandið í Írak sé ekki öruggt fyrir fjölskylduna, en hér á landi líði þeim vel.