Regnbogaofn kísilmálmsmiðju United Silicon verður ræstur strax eftir helgi að sögn Kristleifs Andréssonar, upplýsingafulltrúa United Silicon. Viðgerðir hafa staðið yfir að undanförnu eftir að 1.600 gráðu heitur kísilmálmur lak niður á gólf svo skemmdir urðu á gólfi og rafmagni.
„Viðgerðir eru langt komnar og aðeins frágangurinn eftir,“ segir Kristleifur í samtali við mbl.is. Hann segir það fyrst og fremst prófanir sem séu eftir þar sem ákveðnar breytingar hafi verið gerðar á búnaðinum.
Spurður um stöðu milljarðagreiðslu United Silicon til ÍAV verktaka segist Kristleifur ekki vilja tjá sig um málið að öðru leyti en að það sé í höndum lögfræðinga fyrirtækisins.