„Það liggur fyrir að það er verið að vinna að breytingu á lögunum,“ segir Sigríður Á. Andersen dómsmálaráðherra í samtali við mbl.is. Hún kynnti fyrr í mánuðinum á fundi ríkisstjórnarinnar vinnu við frumvarp í ráðuneytinu um endurskoðun laga þar sem kveðið er á um uppreist æru og óflekkað mannorð.
Þar kom fram að stefnt er að því að ekki verði lengur í boði að veita uppreist æru.
Eins og Stundin greindi frá í morgun fékk maður, sem dæmdur var fyrir að nauðga stjúpdóttur sinni nær daglega frá því hún var um 5 ára gömul þar til hún var tæplega 18 ára, uppreist æru 16. september síðastliðinn, sama dag og barnaníðingurinn Robert Downey.
Sigríður sagðist ekki geta svarað því hversu langt vinna við frumvarpið væri komin. Hún stefnir á að leggja frumvarp fram á haustþingi en Alþingi verður sett 12. september.
„Þetta verður á þingmálaskránni í haust, fyrir áramót. Það liggur fyrir,“ segir Sigríður og bætir við að hversu langan tíma afgreiðsla málsins taki sé síðan í höndum þingsins.