Rúmlega fimm þúsund skókassar með jólagjöfum söfnuðust til barna í Úkraínu í verkefninu Jól í skókassa.
Gámur með gjöfunum lagði af stað frá KFUM- og KFUK-húsinu við Holtaveg í gær, að því er kemur fram á vefsíðu samtakanna.
Lokafjöldi jólakassanna var 5.110 og verða þeir gefnir börnum á munaðarleysingjaheimili, barnaspítala og til barna einstæðra mæðra sem búa við sára fátækt í Kirovograd í Úkraínu.
Söfnunin fór fyrst fram fyrir jólin 2004. Fyrst um sinn söfnuðust um 500 skókassar en þeir hafa verið um 5.000 undanfarin ár.
Verkefnið fer þannig fram að fólk er beðið að útbúa skókassa með lausu loki og setja í þá hluti í fimm flokkum; leikföng, skóladót, hreinlætisvörur, sælgæti og föt.