Leitinni að Rimu Grunskyté Feliksasdóttur, sem talið er að hafi fallið í sjóinn við Dyrhólaey, verður ekki framhaldið í dag vegna slæmra veðurskilyrða á leitarsvæðinu.
Þetta sagði Sveinn Kristján Rúnarsson, yfirlögregluþjónn hjá lögreglunni á Suðurlandi, í morgunfréttum RÚV.
Ákvörðun um áframhaldandi leit verður tekin í kvöld en stefnt er að því að halda leit áfram um helgina.
Leitað var að konunni bæði á Þorláksmessu og aðfangadag án árangurs. Ekkert hafði spurst til hennar síðan á föstudagskvöldið. Engin formleg leit var í gær en björgunarsveitin Víkverji í Vík fór á leitarsvæðið í gærmorgun.