Mjög sáttur við niðurstöðuna

Ragnar Þór Ingólfsson segist mjög sáttur við niðurstöðu allsherjaratkvæðagreiðslu sem fór fram í dag. En líkt og mbl.is greindi frá fyrr í dag var Ragnar Þór Ingólfsson endurkjörinn formaður VR.

Ragnar sagði kosninguna mjög góða en hann hlaut 63% atkvæða og 65% af greiddum atkvæðum.

Frétt af mbl.is

Ragnar endurkjörinn formaður VR

„Ég hef fundið fyrir miklum stuðningi en þegar kosningar eru annars vegar tekur maður engu sem gefnu,“ sagði Ragnar í samtali við mbl.is.

Ragnar sagðist þó hafa verið vongóður um að hann hlyti eitthvað af atkvæðum og bætti við:

„Það að fá góðan meirihluta er bara ákaflega jákvætt og gefur mér færi á að halda áfram með þau verkefni sem við erum að vinna.“

Helga Guðrún Jónasdóttir.

„Áfram VR“

Mótframbjóðandi Ragnars var Helga Guðrún Jónasdóttir en hún hlaut 34,3% atkvæða.

„Ég er bara óskaplega þakklát fyrir allan stuðninginn og þakklát mínu stuðningsfólki fyrir frábæra baráttu, en þetta bara hafðist ekki,“ sagði Helga Guðrún í samtali við mbl.is.

„Svo bara óska ég Ragnari góðs gengis og áfram VR,“ sagði Helga Guðrún að lokum.

• 1 blogg um fréttina

Bloggað um fréttina

• Páll Vilhjálmsson: VR falsar niðurstöðu formannskjörs