Innlent | mbl | 11.4.2022 | 19:00

Þrír voru handteknir í aðgerðum héraðssaksóknara

Héraðssaksóknari fer með rannsókn málsins. mbl.is/Hjörtur

Samtals þrír voru handteknir í aðgerðum héraðssaksóknara á fimmtudaginn sem beindust gegn starfsmönnum Innheimtustofnunar og störfum þeirra fyrir stofnunina, meðal annars hvort verkefnum hafi verið ráðstafað í eigin þágu. Ekki var farið fram á gæsluvarðhald í málunum.

Frétt af mbl.is

Handtökur og húsleitir fyrir vestan

Á fimmtudaginn var greint frá því að starfsmenn héraðssaksóknara hefðu farið á Ísafjörð og ráðist í húsleit og handtekið Braga Axelsson, forstöðumann útibús stofnunarinnar á Ísafirði. Í kjölfarið var greint frá því að Braga og Jóni Ingvari Pálssyni, forstjóra stofnunarinnar sem hafði verið í leyfi vegna málsins, hefði verið sagt upp störfum.

Samkvæmt heimildum mbl.is var Jón Ingvar einnig handtekinn í aðgerðum héraðssaksóknara á höfuðborgarsvæðinu, sem og annar starfsmaður stofnunarinnar.

Frétt af mbl.is

Hafi ráðstafað innheimtuverkefnum eigin þágu

Ólafur Þór Hauksson héraðssaksóknari staðfestir við mbl.is að ekki hafi verið farið fram á gæsluvarðhald í málinu og samtals hafi 10 manns farið vestur og 6-8 tekið þátt í aðgerðunum á höfuðborgarsvæðinu. Segir hann að framkvæmdar hafi verið leitir, handtökur og svo yfirheyrslur. Hins vegar hafi ekki verið tilefni til gæsluvarðhalds, en Ólafur segir að slíkt hefði í málum sem þessum verið vegna rannsóknarhagsmuna, en það hafi ekki verið talið þarft í þessu máli.

Hann segir að búast megi við að yfirheyra þurfi fleiri í kjölfar aðgerðanna og jafnvel að ræða við einhverja aðila aftur. Hann segir rannsókn málsins í farvegi, en að svona aðgerðir „klári ansi margt.“