Dyraverðir á sex stöðum án réttinda

Réttindalausir dyraverðir voru við störf á sex stöðum í miðbæ Reykjavíkur þegar eftirlit var haft með skemmtistöðum frá klukkan 22 í gærkvöldi til klukkan 1 í nótt.

Dyravörðunum var gert að hætta störfum og vaktstjórum gert að útvega dyraverði í stað þeirra með réttindi.

Málin eru rannsökuð sem brot á lögum um veitingastaði,  gististaði og skemmtanahald. Staðirnir og ábyrgðarmenn þeirra eiga yfir höfði sér sekt vegna þessa, að því er segir í dagbók lögreglunnar á höfuðborgarsvæðinu.

Lögreglan að störfum. mbl.is/Eggert Jóhannesson

Líkamsárás og eignaspjöll

Á ellefta tímanum í gærkvöldi var óskað aðstoðar vegna líkamsárásar og eignaspjalla í Vesturbænum í Reykjavík.

Tveir voru kærðir fyrir brot á lögreglusamþykkt um þrjúleytið í nótt fyrir að kasta af sér þvagi á almannafæri í miðbæ Reykjavíkur.

mbl.is/Eggert Jóhannesson

Tilkynnt til barnaverndarnefndar

Ökumaður var á áttunda tímanum sektaður fyrir að aka með of marga farþega og börn sem voru ekki í viðeigandi öryggisbúnaði. Málið verður tilkynnt til barnaverndarnefndar.

Ökumaður var sektaður fyrir of hraðan akstur í Árbænum um hálftólfleytið í gærkvöldi. Hann ók á 111 km/klst þar sem hámarkshraðinn er 80 km/klst.

Þá voru þrír ökumenn handteknir, grunaður um akstur undir áhrifum fíkniefna eða áfengis og einn fyrir að aka bifreið sviptur ökuréttindum.

• 1 blogg um fréttina

Bloggað um fréttina

• Geir Ágústsson: Réttindi til að skeina sér