Samfylkingin verður að vera trú sinni stefnu um jafnrétti karla og kvenna og vera óhrædd við að brjóta niður kynjamúra og breyta þannig samfélaginu til hins betra. Þetta kemur fram í ályktun kvennahreyfingar Samfylkingarinnar. Mikilvægt er að tryggja að konur og karlar skipi forystusæti á framboðlistum til jafns, segir ennfremur í ályktuninni.
„Í þrígang höfum við í Samfylkingunni valið okkur konu sem formann og fyrstu konurnar í embættum forsætisráðherra, fjármálaráðherra og fjármála- og efnahagsráðherra koma úr okkar röðum. Í ríkisstjórnum Jóhönnu Sigurðardóttur var þeim sögulega áfanga einnig náð að konur urðu í fyrsta sinn jafnmargar og fleiri en karlar í ríkisstjórn á Íslandi,“ segir í ályktuninni.
Undir forystu Samfylkingarinnar hefur ríkisstjórnin tryggt jafnan hlut karla og kvenna meðal ráðuneytisstjóra og í nefndarstörfum á vegum Stjórnarráðsins og lög hafa nú verið sett sem tryggja a.m.k. 40% þátttöku hvors kyns í stjórnum fyrirtækja og lífeyrissjóða. Til þessa þurfti styrk og þor Samfylkingarinnar.
„Nú hefur Samfylkingin stigið enn eitt skref í átt til aukinna áhrifa kvenna og samþykkt fléttu- eða paralista í öllum kjördæmum. Mikilvægt er að tryggja að konur og karlar skipi forystusæti á framboðlistum til jafns. Fyrir kosningarnar 2009 leiddi kona aðeins einn lista af sex. Það er í okkar höndum að láta það ekki gerast aftur. Það á ekki að vera þannig í nútímalegum jafnaðarmannaflokki að karlar leiði og konur fylgi. Nú er tækifæri fyrir alla flokksfélaga í Samfylkingunni að sýna í verki að þeir vilji að flokkurinn verði áfram brjóstvörn og brimbrjótur femínismans á Íslandi. Ekki bara í orði, heldur einnig á borði.
Stjórn Kvennahreyfingar Samfylkingarinnar skorar á alla sanna femínista að styðja konur til forystu. Breytum samfélaginu og byrjum hjá okkur sjálfum,“ segir í ályktun kvennahreyfingar Samfylkingarinnar.