Bæjarfulltrúar Sjálfstæðisflokks og Bjartrar framtíðar í Hafnarfirði hafa gert með sér samkomulag um meirihlutamyndun í bæjarstjórn. Samstarfið er byggt á málefnasamningi sem kynntur verður nánar á fyrsta fundi nýrrar bæjarstjórnar 18. júní.

Guðlaug Kristjánsdóttir verður forseti bæjarstjórnar og Rósa Guðbjartsdóttir formaður bæjarráðs.

Helstu markmið og verkefni eru eftirfarandi:

„Bæjarfulltrúar Sjálfstæðisflokks og Bjartrar framtíðar munu kappkosta að því að vinna að gerð langtímastefnu um framtíð bæjarins á kjörtímabilinu og að leitað verði eftir frumkvæði og þátttöku bæjarbúa og samstöðu innan bæjarstjórnar,“ segir í fréttatilkynningu.

„Vönduð og skilvirk stjórnsýsla sem nýtir sér nýjustu þekkingu og tækni er forsenda fyrir velgengni bæjarins. Lögð er áhersla á ábyrga og trausta fjármálastjórnun með skýr og mælanleg langtímamarkmið.

Mikilvægt er að hafa samráð við notendur þegar þjónusta er mótuð og styðja frumkvæði og áhuga bæjarbúa, félagasamtaka og grasrótarhreyfinga í hvers kyns samfélagsverkefnum sem stuðla að bættum hag og góðri líðan bæjarbúa í virku samfélagi. Umhverfisvitund, mannréttindi, lýðræði og lýðheilsa verður í forgrunni í allri stefnumótun á kjörtímabilinu og hugað að samþættingu þvert á málaflokka. Aðgengi fólks að þjónustu og upplýsingum þarf að vera tryggt, hvort sem horft er til sérþarfa svo sem vegna fötlunar, uppruna eða aldurs. Hafnarfjörður er fjölskylduvænn bær – sem horfir björtum augum til framtíðar,“ segir í tilkynningunni.

Fyrstu verkefni nýrrar bæjarstjórnar:

• Ráðning bæjarstjóra með reynslu af rekstri og stjórnun.

• Óháð úttekt á fjárhagsstöðu bæjarins.

• Hefja verkefni um atvinnuþróun og markaðssetningu með áherslu á miðbæinn.

• Greina kosti á staðsetningu hjúkrunarheimilis.

• Endurskoðun frístundastyrkja barna og frístundaaksturs.

• Leita leiða til að hefja aftur starfsemi í St. Jósefsspítala í samstarfi við hagsmunaaðila.

• Haldið verði áfram verkefninu um plastpokalausan bæ.

• Hraða tækjavæðingu og lagfæringu á aðbúnaði í skólum.

• Hreinsun og fegrun atvinnusvæða.

• Rekstur félagslega húsnæðiskerfisins endurskoðaður með fjölgun íbúða að markmiði.

• Mótun heildstæðrar heilsustefnu bæjarins.

• Bókhald bæjarins opnað.

• Úttekt og þarfagreining á húsnæði íþróttamannvirkja bæjarins m.t.t. nýtingar.

Tengdar fréttir

Sveitarstjórnarkosningar

„Framsóknarlegt að vilja bara borgarstjórastólinn“

• „Það hefur aldrei reynt á það í sögu borgarinnar“
• Ekki skýrt hvort Framsókn sé til vinstri eða hægri
• Yngsti borgarfulltrúinn: „Þetta er ákall um breytingar“
• Hafna Borgarlínu og vilja betri rekstur

» Fleiri tengdar fréttir

• Blogga um frétt