„Þetta er afar öflugur listi sem var samþykktur samhljóða,“ segir Páll Magnússon, oddviti lista Sjálfstæðisflokksins í Suðurkjördæmi, en listinn var samþykktur af kjördæmisráði í dag. Unnur Brá Konráðsdóttir alþingismaður færðist upp um eitt sæti á listanum eftir að Rangheiður Elín Árnadóttir hafnaði fjórða sæti sem hún fékk í prófkjöri flokksins. Þá komu nýjar inn á listann þær Kristín Traustadóttir í fimmta sæti og Hólm­fríður Erna Kjart­ans­dótt­ir í það sjötta.

Frétt mbl.is: Páll, Ásmundur og Vilhjálmur efstir

Segir Páll að ef horft sé til efstu átta sætanna sé mikil blanda á listanum, bæði af ungu fólki, eldra fólki, körlum og konum. Segir hann rétt að umræða hafi átt sér stað um stöðu kvenna á listanum en hann trúi því að niðurstaða prófkjörsins byggist ekki á kynjasjónarmiðum heldur pólitískum ástæðum kjósenda flokksins í kjördæminu.

Bendir Páll á að fyrir síðustu kosningar hafi tvær konur verið efstar á listanum og þá hafi engum dottið í huga að gera ætti neinar breytingar. „Ég lít á hvort tveggja, bæði þegar konur verma efstu sætin og lenda neðar, sem pólitískar ástæður sem kjósendur Sjálfstæðisflokksins í kjördæminu hafa komist að,“ segir Páll og bætir við: „Það er sama hugsun um framgang og þegar þær komast ekki áfram.“

Það eru þó ekki bara kynjahlutföll sem geta valdið umræðum um uppröðun og segir Páll að á fundinum hafi meðal annars verið bent á að hlutfall ákveðinna svæða í kjördæminu væri heldur bágborið. Segir Páll að erfitt sé að gera öllum til geðs þegar horft sé til svæðaskiptingar, kynja, aldurs, og fleiri atriða.

Tengdar fréttir

Alþingiskosningar 2016

Brutu lög með SMS-skilaboðum

• Skýrslan var tilbúin fyrir kosningar
• Lítill stuðningur við ríkisstjórnina
• „Báknið byggt upp“
• Gaf frá sér formennsku í þremur nefndum

» Fleiri tengdar fréttir

• Blogga um frétt