„Þetta var upplýsandi fundur og tilgangur hans var að fá frambjóðendur til að kynna mál og málefni fyrir eldri borgara,“ segir Gísli Jafetsson, framkvæmdastjóri Félags eldri borgara í Reykjavík, en félagið stóð í morgun fyrir fundi með forystumönnum framboðanna í Reykjavík ásamt Gráa hernum og Samtökum aldraðra .
Eins og sjá má á myndunum sem ljósmyndari mbl.is sóttu fjölmargir fundinn þar sem fjallað var um stöðu, þjónustu og kjör eldri borgara og lífeyrisþega í Reykjavík og sýn hvers flokks á þessi mál.
Aðspurður segir Gísli það mismunandi eftir flokkum hvort næg áhersla sé lögð á málefni eldri borgara fyrir kosningarnar. „Þessi klassískari framboð eru allsstaðar með mál og málefni eldri borgara í sínum stefnuskrám og kosningagögnum.“
„Ein sjö framboð lýstu yfir miklum áhuga á því að starfa með Félagi eldri borgara í Reykjavík að uppbyggingu gagnvart eldri borgurum,“ sagði Gísli, og að framboðin sjö hefðu verið Samfylkingin og Vinstri græn, Miðflokkurinn, Þjóðfylkingin, Alþýðufylkingin , Framsóknarflokkurinn og Sjálfstæðisflokkurinn.
„Við erum ánægð með fundinn og góða mætingu og nú er bara hægt að skila árangri.“