Örfá aukakíló ekki hættuleg

Þýskir vísindamenn segja örfá aukakíló ekki vera heilsunni hættuleg, hins vegar sé óheppilegt að vera í yfirvigt. Þetta kemur fram á vef danska dagblaðsins Politiken. 

Að sögn vísindamannanna eru örfá aukakíló alls ekki skaðleg heilsunni líkt og margir halda. Rannsókn þeirra náði til á fimmta tug þátttakenda og hafði það að markmiði að skoða tengsl þyngdar við lífaldur og sjúkdóma. 

Samkvæmt niðurstöðu rannsóknarinnar er fólk með líkamsþyngdarstuðul (BMI) á bilinu 25-30 alls ekki í aukinni hættu á að fá sjúkdóma eða lifa skemur en þeir sem eru í kjörþyngd. Að mati vísindamannanna eru líkur til þess að örfá aukakíló hafi raunar verandi áhrif gagnvart hættunni á að fá sjúkdóma eða deyja um aldur fram. 

Þeir sem hins vegar mælast með líkamsþyngdarstuðul á bilinu 30-40 auka hættuna á því að deyja um aldur fram um 20%. Þeir sem mælast með líkamsþyngdarstuðul yfir 40 auka líkurnar á því að deyja um aldur fram um 200%. 

Reiknireglan sem stuðst er við til þess að reikna út líkamsþyngdarstuðulinn er:  BMI = þyngd/ (hæð X hæð). Þyngd er mæld í kílóum og hæð í metrum. 

Þeir sem mælast með BMI undir 20 teljast of léttir, þeir sem eru með BMI á bilinu 20-25 teljast í kjörþyngd. Þeir sem mælast með BMI á bilinu 25-27 teljast yfir kjörþyngd, á bilinu 27-30 of þungir og meira en 30 allt of þungir.  

• 1 blogg um fréttina

Bloggað um fréttina

• Haukur Baukur: Vantar ekki eitthvað í þessa formúlu?