Flestar háhraðatengingar eru á hvern íbúa á Íslandi þegar horft er til Norðurlandanna. 26 háhraðanetsáskriftir eru á hverja 100 íbúa hér á landi en Svíþjóð er næst á eftir Íslandi með 17 slíkar tengingar á hverja 100 íbúa. Þetta kemur fram í sameiginlegri skýrslu fjarskiptaeftirlitsstofnana á Norðurlöndunum.
Í skýrslunni eru nokkrir mikilvægir þættir fjarskiptanotkunar íbúa í viðkomandi löndum eru bornir saman. Eystrasaltslöndin hafa svo bæst við skýrsluna á síðustu þremur árum og eru Eistland, Litháen og Lettland þátttakendur í samanburðinum. Alls er samanburðurinn gerður milli átta landa.
Meðal þess sem mælt er í þessari skýrslu er háhraðanets áskriftir yfir fasta línu. Þar stendur Ísland framar öðrum löndum sem borin eru saman í skýrslunni. Í árslok 2014 voru 26 háhraðanets áskriftir á hverja 100 íbúa hér á landi með meira en 30 Mb/s internethraða.
Næsta land á eftir Íslandi er Svíþjóð þar sem 17 áskriftir á hverja 100 íbúa eru með meira en 30 Mb/s internethraða. Í tilkynningu frá Mílu kemur fram að þennan árangur megi rekja að stórum hluta til þess að síðustu ár hefur Míla unnið að uppbyggingu ljóstenginga til yfir 90% heimila á landinu. Ljóstengingar Mílu veita heimilum 50 – 100 Mb/s internethraða og eru þær aðgengilegar í þéttbýli um land allt.