Erlent | mbl | 5.7.2015 | 17:59 | Uppfært 18:18

Einn og innilokaður í 23 tíma á dag

David Sweat. AFP

David Sweat, annar strokufanganna sem sluppu úr fangelsi í New York í síðasta mánuði, hefur nú verið útskrifaður af sjúkrahúsi og er kominn aftur á bak við lás og slá.

Eins og frægt er orðið sluppu mennirnir á ótrúlegan hátt úr fangelsinu og gengu lausir í um þrjár vikur. Sweat náðist lifandi en félagi hans Richard Matt var skotinn til bana af lögreglu.

Sweat hefur legið á sjúkrahúsi síðan hann var gripinn fyrir viku, en hann varð fyrir tveimur skotum. Hann hefur nú verið færður í Five Points-fangelsið í New York, sem er hundrað kílómetra frá Clinton-fangelsinu þaðan sem þeir sluppu.

Í yfirlýsingu frá lögreglu kemur fram að Sweat sé nú í skoðun á sjúkrahúsi fangelsisins áður en hann verði færður í fangaklefa þar sem hann verði einn og innilokaður í 23 klukkustundir á sólarhring. Þá er einnig sjálfsvígsvakt um Sweat, en klefinn er útbúinn þannig að hann mun lítið geta hreyft sig.

Þúsundir lögreglumanna tóku þátt í leitinni að Sweat og Matt, sem voru þeir fyrstu til að sleppa úr fangelsinu í yfir 100 ár. Til þess að brjótast út úr fangelsinu notuðu mennirnir ýmis verkfæri og nú hefur komið í ljós að fangelsisstarfsmennirnir Joyce Mitchell og Gene Palmer smygluðu verkfærum til fanganna með hamborgarakjöti.

Matt og Sweat tókst að komast í gegnum vegg í klefa sínum, sem er meðal annars styrktur með járni, og komast inn í loftræstigöng. Þar þurftu þeir að brjóta niður vegg, saga í gegnum þykka lögn, skríða eftir henni og saga enn eitt gatið í vegg. Loks komust þeir upp um ræsi fyrir utan veggi fangelsisins.