Að minnsta kosti 14 létu lífið í þremur sjálfsmorðsárásum í norðaustur Nígeríu í dag. Talið er að hryðjuverkasamtökin Boko Haram beri ábyrgð á árásunum en þær þykja minna á fyrri árásir samtakanna.
Árásirnar voru allar í borginni Damaturu sem er höfuðborg Yobe ríkis. Aðeins eru nokkrir dagar síðan að samtökin lýstu yfir ábyrgð á þremur árásum nálægt Abuja. Þá létust átján manns.
Damaturu hefur oft orðið fyrir árásum Boko Haram. Í síðasta mánuði létust sex manns á rútustöð í borginni þegar ung stúlka sprengdi sig þar í loft upp. Hún er talin hafa verið aðeins tólf ára gömul.
Fyrsta árásin í dag varð í lítilli matvöruverslun og þar létust fjórir. Næsta árás var nálægt mosku og lést þar einn á meðan níu manns, þar á meðal heil fjölskylda, létu lífið þegar að maður sprengdi sig í loft upp við útjaðra borgarinnar.
Tíu særðust í árásunum, þar af þrír alvarlega.
Ríkisstjóri Yobe, Ibrahim Gaidam kallaði árásirnar „villimannslegar og huglausar“ og kallaði eftir því að eftirlit í borginni yrði aukið. Talsmaður lögreglu sagði að árásirnar hafi verið gerðar snemma í morgun eða á milli klukkan 5:30 og 6 að staðartíma.
Muhammadu Buhari, forseti Nígeríu, hefur gefið hershöfðingjum sínum þrjá mánuði til þess að stöðva Boko Haram en að minnsta kosti 17.000 manns hafa látið lífið í árásum þeirra frá árinu 2009.
Rúmlega 1.260 hafa látið lífið síðan hann tók við embætti 29. maí.