Fyrsti tyrkneski hermaðurinn lét lífið í Sýrlandi í gær. Hann var um borð í skriðdreka sem sprengdur var upp af kúrdískum vígamönnum. Kúrdar segjast alls hafa eyðilagt þrjá skriðdreka.
Áhlaupið hófst fyrr í vikunni þegar tyrkneskar herflugvélar og skriðdrekar fóru yfir landamæri Sýrlands ásamt sérsveitarmönnum. Sveitir sýrlenskra uppreisnarmanna tilkynntu í kjölfarið að þær hefðu náð yfirráðum í landamærabænum Jarablus með aðstoð tyrkneska hersins, en bærinn var áður á valdi hryðjuverkasamtakanna Ríkis íslams.
Stjórnvöld í Tyrklandi segja aðgerðir tyrkneska hersins beinast gegn bæði Ríki íslams og uppreisnarsveitum Kúrda í Sýrlandi.