Rodrigo Duterte, forseti Filippseyja, baðst í dag afsökunar á því að ekki hefði tekist að bjarga þýskum gísl en herskáir íslamistar á Filippseyjum tóku manninn af lífi í gær.
Öfgahópurinn kallar sig Abu Sayyaf og hefur birt myndskeið af því sem sagt er vera aftaka á gíslinum, Jurgen Kantner. Filippeysk yfirvöld höfðu áður komist á snoðir um að samtökin hefðu tekið Kantner af lífi.
„Við reyndum okkar besta. Aðgerðir hersins höfðu verið í gangi í einhvern tíma en okkur mistók. Við verðum að viðurkenna það,“ sagði Duterte við fréttamenn í morgun.
„Stefna okkar er að gefast ekki upp fyrir þeim sem heimta að við borgum lausnargjald. Það myndi bara verða til þess að fjölga svona tilfellum,“ sagði hann og vísaði til þess að gíslatökumennirnir hefðu farið fram á um 65 milljónir króna í lausnargjald.
Öfgahópurinn Abu Sayyaf er hliðhollur hryðjuverkasamtökunum Ríki íslams. Hópurinn hefur ítrekað rænt útlendingum í áratugi og haldið þeim gegn lausargjaldi í frumskógum Suður-Filippseyja.
Heryfirvöld greindu frá því í morgun að þau væru að leita að líki Kantner. Einnig greindu þau frá því að leit stæði yfir að rúmlega 20 gíslum.