„Algjörlega tilbúin“ að bregðast við

Trump segist eiga í einstaklega góðu sambandi við forseta Kína.
Trump segist eiga í einstaklega góðu sambandi við forseta Kína. AFP

Bandaríkin eru „algjörlega tilbúin“ að bregðast við hótunum yfirvalda í Norður-Kóreu. „Við erum svo tilbúin að þú trúir því ekki,“ sagði Donald Trump, forseti Bandaríkjanna, í viðtali í þættinum Sunday Morning Futures sem sýndur var í morgun á Fox-sjónvarpsstöðinni. Forsetinn lagði einnig mikla áherslu á hve „einstaklega gott samband“ hann ætti við forseta Kína, Xi Jinping. AFP-fréttastofan greinir frá.

Spennan á milli Bandaríkjanna og Norður-Kóreu var til umræðu í þættinum, en hún hefur aukist jafnt og þétt síðustu mánuði. Trump hefur verið yfirlýsingaglaður og meðal annars hótað Norður-Kóreu „gereyðingu“ og Kim Jong-un hefur brugðist við með álíka ummælum.

„Þú fengir áfall ef þú vissir hve algjörlega tilbúin við erum, ef við þurfum á því að halda,“ sagði Trump einnig við þáttastjórnandann, til að leggja áherslu á mál sitt. „Væri ekki gott að gera það? Svarið er jú,“ hélt hann áfram og ýjaði að yfirvofandi átökum á milli landanna. „Mun það gerast? Hver veit?“ bætti forsetinn svo við.

Alþjóðasamfélagið hefur á síðustu mánuðum brugðist harkalega við eldflaugatilraunum Norður-Kóreu en sex tilraunaskot á langdrægum eldflaugum hafa verið framkvæmd á síðustu mánuðum.

Spurður út í áratugagamalt bandalag Kína og Norður-Kóreu, sagðist hann hafa beðið yfirvöld í Kína um aðstoð við að fylgja eftir refsiaðgerðum gegn Norður-Kóreu.

„Hann stendur fyrir Kína og ég fyrir Bandaríkin,“ sagði Trump um Xi, forseta Kína. „En við eigum í einstaklega góðu sambandi. Kína er virkilega að hjálpa okkur. Kína er stórt og þeir hafa vald til til að gera það sem skiptir máli í tengslum við Norður-Kóreu.“

mbl.is
Fleira áhugavert
Fleira áhugavert