Uppreisnarmenn og fjölskyldur voru í dag flutt frá austurhluta Ghouta-héraðs til Idlib-héraðs í norðvesturhluta Sýrlands. Rútur fluttu fólkið þangað eftir margra klukkustunda bið á hlutlausu svæði áður en leyfi fékkst til þess að fara inn á svæði stjórnvalda.
Samningur um brottflutning fólksins var samþykktur í gær. Rússar fóru fyrir samningunum en stjórnarher Sýrlands og rússneskar hersveitir hafa gert sprengjuárásir í Ghouta vikum saman.
Uppreisnarmenn hafa undir sinni stjórn þrjú aðskilin landsvæði í Ghouta-héraði og talið er að þessir brottflutningar gætu orðið til þess að stjórnarherinn nái einu þeirra á sitt vald.
Þá gæti það aukið pressu á uppreisnarmenn á hinum tveimur svæðunum að gera sams konar samning og stjórnvöld því náð aftur öllu svæðinu á sitt vald. Tugir þúsunda íbúa sitja þar enn fastir frá því stjórnarherinn setti svæðið í herkví eftir valdatöku uppreisnarhópanna árið 2013.