Forseti framkvæmdastjórnar Evrópusambandsins, Jean Claude Junker, segir ekkert rými til þess að endursemja um Brexit, en forsætisráðherra Bretlands og leiðtogi Íhaldsflokksins, Theresa May, fundar í dag með leiðtogum Evrópuríkja eftir að hafa frestað atkvæðagreiðslu í breska þinginu um samning um útgöngu Bretlands úr sambandinu.
Samkvæmt umfjöllun Guardian sagði Junker á fundi Evrópuþingsins í Strassborg í dag að Brexit yrði nú óvænt á dagskrá. „Ég er hissa vegna þess að við vorum komin að samkomulagi,“ sagði hann.
Junker, sem mun funda með May í kvöld, sagði jafnframt að „það er ekkert rými til þess að endursemja, en það er vissulega hægt með vitrænum hætti að fara yfir skilgreiningaratriði og túlkanir án þess að opna á nýjar samningaviðræður. Það verða allir að skilja að viðræður um innihald útgöngusamningsins eru ekki í boði.“
Ljóst varð í síðustu viku að erfitt yrði fyrir May að fá nægilegan stuðning í breska þinginu til þess að Brexit-samningurinn yrði samþykktur, en allir stjórnarandstöðuflokkarnir, samstarfsflokkur Íhaldsflokksins í ríkisstjórn og stór hluti þingmanna Íhaldsflokksins hafa lýst því yfir að þeir hyggjast ekki styðja samningin.
Í gær tilkynnti forsætisráðherrann að hún myndi fresta atkvæðagreiðslu um samninginn.