Ríkisstjórn Theresu May, forsætisráðherra Bretlands, vinnur nú að því að undirbúa útgöngu úr Evrópusambandinu án samnings. Óvissa ríkir hvort Brexit-samningurinn, sem ríkisstjórnin og Evrópusambandið hafa náð sátt um, verði samþykktur á breska þinginu í janúar.
BBC greinir frá því að ráðherrar ríkisstjórnarinnar muni hittast í dag og ræða meðal annars hversu mikið fjármagn hvert ráðuneyti fái til að undirbúa útgöngu án samnings, verði það niðurstaðan. 101 dagur er til stefnu en til stendur að Bretland yfirgefi ESB 29. mars á næsta ári.
Þó svo að lítil samstaða ríki um Brexit-samninginn eru margir þingmenn einnig mótfallnir því að Bretland gangi úr ESB án samnings. 60 þingmenn hafa tekið sig saman og birt yfirlýsingu, stílaða á May, þar sem þeir segja að útganga án samnings muni leiða til skaðlegra efnahagslegra áhrifa sem annars væri hægt að koma í veg fyrir.
May stendur í ströngu líkt og hún hefur gert síðustu misseri, en í gær tilkynnti Jeremy Corbyn, leiðtogi breska Verkamannaflokksins, að hann hyggst leggja fram vantrauststillögu gegn May.
Tillagan er einkum rökstudd með slælegum vinnubrögðum við að undirbúa landið undir fyrirhugaða útgöngu úr Evrópusambandinu. Tæp vika er síðan May varðist vantrausti úr röðum eigin þingmanna. May gefur lítið fyrir vantraustið og segir um „kjánalegt pólitískt leikrit“ að ræða.