Forseti Bólivíu, sem sagði af sér embætti í gær í kjölfar þrýstings, hefur sakað her landsins um valdarán við undirtektir bandamanna sinna í Rússlandi, Kúbu og Mexíkó, þar sem hann hefur auk þess hlotið pólitískt hæli.
Þá hefur Spánn lýst áhyggjum sínum af stöðu bólivíska hersins og segja ástandið minna á augnablik í sögu latnesku Ameríku fyrr á árum.
Evo Morales sagði af sér embætti forseta Bólivíu í gær eftir mikinn þrýsting frá almenningi og loks her landsins, eftir að upp komst að verulegir annmarkar hefðu verið á forsetakosningunum í síðasta mánuði.
Morales virti lög landsins, sem kveða á um að forsetar megi aðeins sitja þrjú kjörtímabil í röð, að vettugi og bauð sig fram í kosningunum sem fram fóru í október. Róstusamt hefur verið í ríkinu allt frá kosningunum, enda vakti það upp stórar spurningar um framkvæmd þeirra þegar tekin var ákvörðun um að fresta því að birta lokatölur um heilan sólarhring án útskýringa.
Það var svo í gær, sunnudag, sem hershöfðingi landsins, Williams Kaliman, lýsti því yfir að farið væri fram á afsögn forsetans til að tryggja frið og stöðugleika og lýsti sig reiðubúinn til að beita loft- og landhernaði gegn vopnuðum stuðningsmönnum forsetans.
Afsögn forsetans virðist þó ekki hafa haft tilætluð áhrif enn sem komið er, en miklar óeirðir hafa verið í La Paz, höfuðborg landsins, undanfarinn sólarhring.