Grísk stjórnvöld girtu af búðir hælisleitenda skammt frá Aþenu í dag eftir að 21 íbúi þar greindist smitaður af kórónuveirunni. Fyrst íbúanna til að greinast var nýbökuð móðir á sjúkrahúsi í Aþenu.
„Frá og með deginum í dag er staðurinn settur í sóttkví í tvær vikur,“ segir í yfirlýsingu frá ráðuneyti sem fer með málefni flóttafólks og hælisleitenda.
Nokkrum klukkutímum áður en greint var frá því að íbúar í búðunum væru smitaðir hafði forsætisráðherra Grikklands, Kyriakos Mitsotakis, lofsungið það hvernig staðið væri að heilbrigðismálum í flóttamannabúðum í Grikklandi.
Í viðtali við CNN sagði Mitsotakis að Grikkir hafi staðið sig vel hvað varðar smitrakningar og að stjórnvöld hafi staðið sig afar vel í því að takast á við faraldurinn á mannlegan hátt við þær aðstæður sem þar eru. Vísar hann þar til aðstæðna í yfirfullum flóttamannabúða.
„Við munum áfram fylgjast mjög grannt með því hvað gerist í búðunum okkar. Við erum að setja upp fleiri læknamiðstöðvar,“ bætti hann við.
Konan sem greindist smituð af kórónuveirunni eftir að hafa fætt barn á sjúkrahúsi í Aþenu fyrr í vikunni. Konan, sem er frá Afríku, er búsett í Ritsona-flóttamannabúðunum. Að sögn yfirvalda hafa verið tekin sýni úr 63 íbúum í Ritsona, en búðirnar eru í 80 km fjarlægð frá Aþenu. Af þeim hafi 20 greinst með veiruna en enginn þeirra væri með sjúkdómseinkenni. Enginn starfsmaður hefur greinst með COVID-19.
Nýbakaða móðirin er fyrsti hælisleitandinn sem greinist með veiruna í grískum flóttamannabúðum. Vegna sóttkvíarinnar er allur aðgangur að Ritsona-búðunum bannaður og verður matur sendur til íbúa samkvæmt upplýsingum frá ráðuneytinu. Bætt verður við heilbrigðisstarfsmönnum í búðunum og sýni tekin hjá öllum íbúum búðanna.
Síðdegis í gær voru staðfest smit í Grikklandi orðin 1.415 talsins og af þeim höfðu 50 látist úr veirunni. Alls búa 11 milljónir í Grikklandi.
Í flóttamannabúðum á meginlandinu og á eyjunum búa þúsundir hælisleitenda við afar erfiðar aðstæður enda miklu fleiri í búðunum en rúmast þar.
Í dag greindu stjórnvöld frá því að önnur kona hafi greinst með kórónuveiruna eftir að hafa fætt barn á fæðingardeild í borginni Kilkis en hún býr þar í íbúð fyrir flóttafólk.