Strákar í Hobro á norðurhluta Jótlands í Danmörku vissu ekki hvaðan á sig stóð veðrið þar sem þeir voru í bófahasar í húsagarði, þegar garðurinn fylltist skyndilega af alvöru vopnuðum lögreglumönnum.
Að sögn danskra fjölmiðla voru drengirnir, sem eru á fermingaraldri, með lambhúshettur á höfði og skutu í erg og gríð úr leikfangabyssum. Kona í næsta húsi sá til þeirra og hélt að þar væru alvöru ræningjar á ferð. Hún hringdi í lögreglu sem sendi víkingasveitarmenn með alvæpni á staðinn.
Drengjunum var skipað að leggjast á jörðina þar sem þeir voru afvopnaðir. En þegar lögreglumennirnir tóku af þeim lambhúshetturnar kom í ljós að ekki var um hættulega glæpamenn að ræða.
Boðað hefur verið til fundar nú síðdegis með lögreglu, drengjunum og foreldrum þeirra til að ræða þetta mál.