Landsnet áréttar að Suðvesturlínur anni ætlaðri orkuþörf

Landsnet hefur sent frá sér yfirlýsingu varðandi umsögn sína til Skipulagstofnunar um Suðvesturlínur, þar sem áréttað er að þær muni geta annað aflþörf stækkaðs álvers í Helguvík, ef af verður sem og öðrum áformum um uppbyggingu iðnaðar og orkuöflun á svæðinu.

Í yfirlýsingunni segir:

„Fram kom í umsögn Landsnets að Norðurál hefði hafið framkvæmdir við allt að 360.000 tonna álver í Helguvík og sé aflþörf þess allt að 435MW en hið rétta er að Norðurál hefur hafið framkvæmdir við allt að 250.000 tonna álver í Helguvík með allt að 435 MW aflþörf. Norðurál stefnir hins vegar að stækkun álversins í 360.000 tonn og nemur heildaraflþörf álvers að þeirri stærð 625 MW. “

Í yfirlýsingunni biðst Landsnet velvirðingar á misræminu og tekur fram að bæði Skipulagsstofnun og Umhverfisráðuneyti hafi fengið senda leiðréttingu á misræmi í umsögn. Þá ítrekar Landsnet um leið að misræmið hafi ekki áhrif á mat á umhverfisáhrifum Suðvesturlína né niðurstöðu umsagnar fyrirtækisins til Skipulagsstofnunar.