Ekkert varð af leit Landhelgisgæslunnar að Birnu Brjánsdóttur, sem týnd hefur verið frá því aðfaranótt laugadags, nú síðdegis. Greint hafði verið frá því að þyrla Landhelgisgæslunnar myndi taka þátt í leitinni í Urriðaholti í Garðabæ.
Þegar áhöfn TF-LIF var að gera þyrluna tilbúna til brottfarar barst beiðni frá Neyðarlínu um aðstoð vegna alvarlegs umferðarslyss í Öræfum. Af þeim sökum gat þyrlan ekki tekið þátt í leitinni eins og til stóð. Í tilkynningu frá Landhelgisgæslunni segir að farið verði til leitar um leið og færi gefst.
Fyrr í dag fór þyrlan TF-GNA í reglubundið æfingaflug yfir Reykjanesskaga. Vegna leitarinnar að Birnu flaug þyrlan meðfram Reykjanesbraut, frá Straumsvík að Kúagerði og aftur til baka til að kanna hvort nokkrar vísbendingar væri þar að finna.