Tveir erlendir karlmenn sitja nú í gæsluvarðhaldi eftir að tollverðir fundu falið í bíl þeirra í Norrænu mikið magn af amfetamínvökva.
Efnið fannst þann 3. október síðastliðinn við venjubundna leit tollvarða við komu ferjunnar til Seyðisfjarðar, að sögn Gríms Grímssonar, yfirlögregluþjóns hjá lögreglunni á höfuðborgarsvæðinu. Grímur vill ekki gefa upp um hve mikið magn er að ræða en segir það með því mesta sem hefur fundist hér á landi. „Þetta slagar hátt í að vera það mesta,“ segir hann.
Mennirnir voru strax handteknir og úrskurðaðir í gæsluvarðhald daginn eftir. Sá gæsluvarðhaldsúrskurður rann út í gær og voru mennirnir leiddir aftur fyrir dómara og úrskurðaðir í 10 daga áframhaldandi gæsluvarðhald. „Þeir eru ennþá í gæslu á grunvelli rannsóknarhagsmuna,“ segir Grímur.
Hann segir málið virðast vera afmarkað og ekki líta þannig út að það tengist öðrum fíkniefnamálum sem komið hafa upp.
Lögreglan á höfuðborgarsvæðinu fer með rannsókn málsins í samvinnu við lögregluna á Austurlandi.