Willum Þór Þórsson, þingmaður Framsóknarflokksins, myndi styðja breytingar á skattkerfinu líkt og verkalýðsfélögin hafa óskað eftir.
„Maður þyrfti að sjá útfærsluna, en í fjárlagafrumvarpi fyrir 2019 veltir ríkisstjórnin upp hugmyndum, t.d. um að skoða samspil skattkerfisbreytinga og bótakerfisins og 14 milljarðar eru settir fram í þeim efnum,“ segir Willum í samtali við mbl.is.
„Ég myndi styðja hugmyndir að þessu leytinu.“
Bjarkey Olsen Gunnarsdóttir, þingflokksformaður Vinstri grænna, segist klárlega myndu styðja breytingar á skattkerfinu, en að ekki væri hægt að segja til um nánari útfærslu þess að svo stöddu.
Haraldur Benediktsson, þingmaður Sjálfstæðisflokksins, segist ekki taka beina afstöðu til tiltekinna skattatillagna. „Ég held það verði að nást niðurstaða í samtal stjórnvalda og vinnumarkaðarins um breytingar.“
„Ég mun þá styðja það samkomulag, verði það hluti af lausn á kjarasamningsviðræðum og tryggi áfram jöfnuð.“