Samtök fyrirtækja í sjávarútvegi segja það ætíð hafa verið afstöðu samtakanna að allir félagsmenn skuli fara að lögum og eftir reglum. Gildi það einu hvar viðkomandi starfsemi fari fram, á Íslandi eða í útlöndum.
Þetta kemur fram í tilkynningu frá samtökunum vegna umfjöllunar um starfsemi Samherja í Afríku.
Þar segir að ásakanirnar á hendur Samherja séu í eðli sínu alvarlegar og að það sé fyrirtækisins að bregðast við. „Ljóst er að mál af þessu tagi getur haft áhrif á orðspor íslensks sjávarútvegs og stöðu á alþjóðlegum markaði. Því er brýnt að málið verði rannsakað og hið rétta komi fram. Það er allra hagur, ekki síst þeirra sem bornir eru þungum sökum.“