Eiríkur Björn Björgvinsson mun leiða lista Viðreisnar í Norðausturkjördæmi í þingkosningum í haust. Þetta herma heimildir miðilsins akureyri.net, en listinn verður að öllum líkindum birtur á morgun.
Eiríkur Björn var áður bæjarstjóri á Fljótsdalshéraði til átta ára og Akureyri jafnlengi. Hann hefur síðustu tvö ár starfað sem forstöðumaður fræðslu- og menningarsviðs Garðabæjar.
Í kosningunum 2017 skipaði Benedikt Jóhannesson, stofnandi Viðreisnar, efsta sæti á lista flokksins í kjördæminu en hafði ekki erindi sem erfiði. Benedikt hefur lýst yfir vilja til að leiða lista flokksins einhvers staðar á höfuðborgarsvæðinu í kosningunum.