Sigurður Þ. Ragnarsson, veður- og jarðvísindamaður, skipar oddvitasæti lista Miðflokksins í Hafnarfirði fyrir komandi sveitarstjórnarkosningar í maí. Bjarney Grendal Jóhannesdóttir grunnskólakennari er í öðru sæti listans.
Almennur félagsfundur Miðflokksins í Hafnarfirði samþykkti tillögu uppstillinganefndar um framboðslistann.
„Við erum ákaflega stolt af þessum sterka lista sem við bjóðum fram hér í Hafnarfirði,“ er haft eftir Sigurði í fréttatilkynningu. „Hafnarfjörðurinn er sterkt og samheldið samfélag byggt á grónum merg og við viljum byggja það upp til framtíðar á þeim grunni,“ segir Sigurður. „Við leggjum höfuðáherslu á að finna skynsamlegar lausnir á þeim áskorunum sem Hafnarfjarðarbær stendur frammi fyrir og viljum fá bæjarbúa og önnur framboð með okkur í uppbyggilega rökræðu um þær. Við göngum því óbundin til kosninganna í vor en erum tilbúin að starfa með öllum sem vilja vinna með okkur að skynsamlegum málum sem bæta hag bæjarbúa. Við munum alltaf setja málefnin í forgang og hlökkum til að kynna stefnumál okkar á næstu vikum.“
Þriðja sæti listans skipar Jónas Henning fjárfestir, það fjórða Gísli Sveinbergsson málarameistari, það fimmta Arnhildur Ásdís Kolbeins viðskiptafræðingur og það sjötta Elínbjörg Ingólfsdóttir öryggisvörður.