Rakel Hönnudóttir fær tækifæri á ný sem hægri bakvörður þegar Ísland mætir Þýskalandi í Wiesbaden klukkan 14 að íslenskum tíma í undankeppni HM.
Þá er Fanndís Friðriksdóttir sóknarmaður í tveggja manna sóknarlínu en ekki kantmaður eins og hún hefur oft verið í landsliðinu. Hraði hennar gæti komið að góðum notum í skyndisóknum.
Íslenska liðið mun spila agaðan varnarleik eins og þjálfarinn Freyr Alexandersson fór yfir í Morgunblaðinu í dag. Liðið stillir upp í leikkerfið 5-3-2 í dag en bakverðir hafa þó leyfi til að sækja ef færi gefast.
Ísland verður því með tvo framherja auk þess sem Dagný Brynjarsdóttir hefur það hlutverk að tengja á milli miðju og sóknar. Fyrirliðinn Sara Björk Gunnarsdóttir mun hins vegar líklega halda sig aftarlega á miðjunni með Gunnhildi Yrsu Jónsdóttur.
Byrjunarliðið:
Mark: Guðbjörg Gunnarsdóttir. Vörn: Rakel Hönnudóttir, Glódís Perla Viggósdóttir, Sif Atladóttir, Ingibjörg Sigurðardóttir, Hallbera Guðný Gísladóttir. Miðja: Gunnhildur Yrsa Jónsdóttir, Sara Björk Gunnarsdóttir, Dagný Brynjarsdóttir. Sókn: Fanndís Friðriksdóttir, Elín Metta Jensen.