Landsliðið fékk frí í dag

Landsliðskonurnar, sem hér fagna sigri í Wiesbaden, eru nú komnar …
Landsliðskonurnar, sem hér fagna sigri í Wiesbaden, eru nú komnar til Znojmo. mbl.is/Reimund Sand

Kvennalandsliðið í knattspyrnu skilaði sér á tíunda tímanum í gærkvöldi, að staðartíma, á leikstað í Znojmo í Tékklandi. 

Þar er fram undan hjá liðinu leikur á móti Tékklandi í undankeppni HM á þriðjudaginn. Landsliðið flaug frá Frankfurt til Vínar undir kvöld í gær og kom með rútu til Znojmo sem tók um eina og hálfa klukkustund en bærinn er sem sagt nærri landamærunum að Austurríki.

Landsliðið æfði í Wiesbaden í gærmorgun áður en farið var til Tékklands en fékk frí frá æfingum í dag. Fundahöld eru þó fram undan hjá þjálfurum og leikmönnum í kvöld. 

Á morgun mun liðið æfa seinni partinn á leikvanginum þar sem leikurinn við Tékka fer fram klukkan 16 að íslenskum tíma á þriðjudag. 

mbl.is
Fleira áhugavert
Fleira áhugavert