Það er gaman að spila á móti Val

„Það er gaman að koma inn á gegn þeim,“ sagði glaðbeittur Logi Tómasson þegar mbl.is tók hann tali eftir að hann hafði tryggt Víkingi R. stig með jöfnunarmarki á 88. mínútu gegn Val, 2:2, þegar liðin mættust í Pepsi Max-deild karla í knattspyrnu í kvöld.

Logi er ekki ókunnur því að slá í gegn á móti Val, því margir muna eftir draumamarki hans þegar liðin mættust í upphafsleik Íslandsmótsins á föstudagskvöldi í apríl. Logi klobbaði þá báða miðverði Vals áður en hann lúðraði boltanum upp í samskeytin. Í kvöld skoraði hann jöfnunarmarkið dramatíska með hörkuskoti úr teignum.

„Ég sá að fyrirgjöfin var að koma, Nikolaj [Hansen] fékk boltann í lappir og ég öskraði á hann. Ég náði að taka eina, tvær snertingar og fann svo glufu á milli og náði að setja hann í hornið,“ sagði Logi, en hann fagnaði skiljanlega vel og innilega enda eru mörkin tvö gegn Val hans einu í sumar.

„Það er langt síðan fyrra markið kom og það er gaman að fagna aftur á móti Val,“ sagði Logi og viðurkenndi að hafa verið með fyrra markið í huga þegar hann kom inn af bekknum í síðari hálfleik í kvöld.

„Já, mig langaði að skora aftur og sýna líka að ég eigi að vera í liðinu. Það er alltaf gott að geta hjálpað liðinu,“ sagði Logi, en jöfnunarmarkið var ekki síður mikilvægt því það kom Víkingi upp úr fallsæti.

Frétt af mbl.is

Aftur reyndist Logi Valsmönnum erfiður

• Blogga um frétt