Ríkið eignast 72% í GM

Bandaríska ríkið mun eignast 72,5% hlut í bílaframleiðandanum General Motors samkvæmt tillögum fyrirtækisins, sem miða að því að forða General Motors frá gjaldþroti.

GM segir, að bandaríska fjármálaráðuneytið hafi fallist á áætlun um að stofna nýtt fyrirtæki, sem kaupir eignir bílaframleiðandans og kröfuhafar, sem höfðu hafnað fyrri tillögum, styðji meginmarkmið nýju áætlunarinnar.  

Mikil óvissa hefur ríkt um framtíð General Motors eftir að eigendur 27 milljarða dala skuldabréfa, sem GM hefur gefið út, höfnuðu áætlun um að breyta skuldinni í hlutafé. Þeir hefðu samkvæmt því eignast 10% af fyrirtækinu.

Samkvæmt nýju tillögunni gætu kröfuhafarnir eignast stærri hlut í GM.  

• Blogga um frétt