Hagnaður af rekstri Vátryggingafélags Íslands nam 1164 milljónum króna eftir skatta á árinu 2009 samanborið við 241 milljónar króna hagnað á árinu 2008. Hagnaður af vátryggingarekstri nam 604 milljónum króna og hagnaður af fjármálastarfsemi nam 668 milljónum króna.
Iðgjöld jukust um 15% á milli ára og námu iðgjaldatekjur tæplega 14 milljörðum króna. Á sama tímabili jukust tjón um 12% og nam tjónakostnaður um 12 milljörðum króna á árinu 2009.
Eignir VÍS námu tæpum 34 milljörðum króna í árslok 2009 og eigið fé var nær 11 milljarðar króna. Eiginfjárhlutfall VÍS í árslok 2009 var 32% og gjaldþol var 4,2 sinnum hærra en lágmarksgjaldþol. Handbært fé í árslok var rúmlega 6 milljarðar króna.
Fram kemur í tilkynningu, að í lok árs 2009 átti VÍS ríkistryggð verðbréf og bankainnstæður fyrir tæpa 17 milljarða króna eða sem svarar til 75% af allri vátryggingaskuld félagsins. Á undanförnum árum hafi markvisst verið dregið úr áhættu í eignasafni félagsins. Vátryggingaskuld VÍS nam í árslok tæpum 22 milljörðum króna en heildareignir félagsins námu tæpum 34 milljörðum króna.
Guðmundur Örn Gunnarsson, forstjóri VÍS, segir í tilkynningunni, að það séu fyrst og fremst aðhald í rekstri og varfærin fjárfestingarstefna sem tryggi viðunandi afkomu félagsins. Það valdi hins vegar áhyggjum hve mjög innbrotum og íkveikjum fjölgaði á árinu 2009 og vafalaust megi rekja þetta að einhverju leyti til erfiðleikanna í þjóðfélaginu. Það sem af er þessu ári virðist þessi þróun síst vera í rénum.