Frönsk og þýsk stjórnvöld vilja að fyrirtækjaskattar innan Evrópusambandsins verði samræmdir þannig að kveðið verði á um lágmarks leyfilega skatta. Markmiðið er að koma í veg fyrir að skattaparadísir þrífist innan sambandsins samkvæmt frétt Daily Telegraph.
Fram kemur í fréttinni að verði þessar hugmyndir að veruleika leiði þær líklega til þess að hækka verði fyrirtækjaskatta í Bretlandi. Hugmyndirnar gangi ennfremur þvert á markmið Davids Cameron, forsætisráðherra Breta, að semja um breyttar forsendur fyrir veru Bretlands í Evrópusambandinu þar sem markmiðið sé að endurheimta völd yfir breskum málum en ekki að frekari völd færist til stofnana sambandsins. Því megi búast við andstöðu breskra stjórnvalda.
Fyrirtækjaskattar í Bretlandi eru 20% og í sumum öðrum ríkjum Evrópusambandsins eru þeir jafnvel mun lægri. Sömu skattar eru hins vegar 33-36,6% í Frakklandi, 30-33% í Þýskalandi og 30% á Spáni.