Atvinnulausum hefur fækkað um 1.900 manns milli ára og hlutfallið sömuleiðis um 1,1 prósentustig. Atvinnuleysi mældist 3,2 prósent á fyrsta ársfjórðungi þessa árs. Atvinnulausar konur voru 2.300 og var atvinnuleysi á meðal kvenna 2,5 prósent. Atvinnulausir karlar voru 3.900 eða 3,8 prósent.
Atvinnuleysi var 3,1 prósent á höfuðborgarsvæðinu en 3,4 prósent utan þess.
Þeim sem hafa verið atvinnulausir til lengri tíma fækkaði verulega milli ára og voru alls 400 manns á fyrsta ársfjórðungi þessa árs sem höfðu verið atvinnulausir í tólf mánuði eða lengur samanborið við 1.500 manns á sama tíma í fyrra.
Langtímaatvinnuleysi, sem hlutfall af heildar fjölda atvinnulausra var 6,2 prósent samanborið við 18,4 prósent á sama tíma fyrir ári. Hafa í raun ekki verið færri langtímaatvinnulausir síðan á fjórða ársfjórðungi 2008 þegar þeir voru um 200 manns.
Í frétt Hagstofunnar kemur fram að á fyrsta ársfjórðungi 2016 voru 190.400 manns á aldrinum 16 til 74 ára á vinnumarkaði. Af þeim voru 184.300 starfandi og 6.100 án vinnu og í atvinnuleit. Atvinnuþátttaka mældist 81,8 prósent, hlutfall starfandi mældist 79,2 prósent og atvinnuleysi var 3,2%.
Frá fyrsta ársfjórðungi 2015 fjölgaði starfandi fólki um 5.100 og hlutfallið jókst um 1,7 prósentustig.