Matsfyrirtækið Moody‘s segir að sala Íbúðalánasjóðs á Leigufélaginu Kletti, dótturfélagi sínu, muni hafa jákvæð áhrif á sjóðinn og styrkja afkomu hans á næstu árum, þrátt fyrir að eignir leigufélagsins séu aðeins 1,1% af heildareignum Íbúðalánasjóðs.
Í fréttabréfinu Credit Outlook, sem Moody‘s sendir frá sér, segir að með sölu Kletts fækki fullnustueignum í eigu Íbúðalánasjóðs umtalsvert, fjárbinding minnki og rekstrarkostnaður dragist saman.
Leigufélagið Klettur ehf. var auglýst til sölu á almennum markaði 25. febrúar 2016. Tilkynnt var um það í síðustu viku að Íbúðalánasjóður hefði tekið kauptilboði Almenna leigufélagsins eignarhaldssjóðs í Klett sem hljóðaði upp á rúmlega 10,1 milljarð króna.
Frétt mbl.is: Félagið selt á rúma 10 milljarða
Í fréttabréfi sínu greinir Moody‘s frá því að söluverðið sé rúmum 1,5 milljarði yfir bókfærðu virði félagsins hjá Íbúðalánasjóði sem jafngildi jákvæðum einskiptis áhrifum sem séu 2,4-föld afkoma sjóðsins af reglulegri starfsemi í fyrra.
Þá segir matsfyrirtækið frá því að á sama tíma og tilkynnt var um söluna á Kletti hafi Íbúðalánasjóður gert breytingar á skipulagi sínu sem geri honum kleift að einbeita sér að því að lána til kaupa á húsnæði þar sem lán fæst ekki hjá bönkum.
Búist er við að árlegur rekstrarkostnaður sjóðsins í kjölfar þessara breytinga muni lækka um 324 milljónir þegar aðgerðirnar verða að fullu komnar til framkvæmda árið 2017.