Franska lúxusvörufyrirtækið Louis Vuitton Moët Hennessy hefur ákveðið að selja tískuvörumerkið DKNY fyrir um 650 milljónir dala, sem jafngildir um 79,5 milljörðum íslenskra króna.
Kaupandinn er bandaríska fyrirtækið G-III Apparel.
Þetta er aðeins í annað sinn í um þrjá áratugi sem franska fyrirtækið, sem er ein stærsta tískusamstæða heims, selur vörumerki. Fyrirtækið á vörumerki á borð við Christian Dior, Kenzo og Sephora og hefur verið leiðandi á lúxusvörumarkaðinum í fjöldamörg ár.
Talið er að kaup G-III á Donna Karan International gangi í gegn síðar á þessu ári eða í byrjun næsta árs.
Höfuðstöðvar G-III eru í New York í Bandaríkjunum. Fyrirtækið er meðal annars þekkt fyrir Bass-skólínuna og Vilebrequin-fatalínuna. Það hyggst með kaupunum á DKNY auka umsvif sín á fleiri mörkuðum, sér í lagi lúxusvörumarkaðinum. Kaupin verða fjármögnuð með lánsfé.
Tískuhönnuðurinn Donna Karan stofnaði DKNY árið 1984, einmitt í New York. Hún hætti hjá fyrirtækinu í fyrra og ákvað þess í stað að einbeita sér að Urban Zen-línunni sinni.
Louis Vuitton Moët Hennessy keypti Donna Karan árið 2001 fyrir yfir 200 milljónir dala.