Samtök olíuframleiðsluríkja (OPEC) samþykktu í dag að draga úr olíuframleiðslu um 750 þúsund tunnur á dag. Þetta hefur Bloomberg fréttaveitan eftir meðlimi í samtökunum. Fréttirnar urðu til þess að verð á hráolíu hækkaði strax um 5% á markaði, en markaðsaðilar höfðu gert ráð fyrir að fundurinn aðildarríkjanna myndi enda án niðurstöðu.
Verð á Brent Norðursjávarolíu hækkaði í kauphöllinni í London um 2,72 dali upp í 48,69 dali. Í New York hækkaði verð á hráolíu um 2,38 dali og fór upp í 47,05 dali.
OPEC-samtökin samanstanda af nokkrum af stærstu olíuframleiðsluríkjum heims og framleiða þau um 40% af heimsframleiðslunni. Með ákvörðuninni í dag mun framleiðsla þeirra dragast saman niður í 32,5 milljón tunnur á dag.
Fundur samtakanna fór fram í Alsír og var tilgangur hans að ræða mögulegan samdrátt á framleiðslu til að ýta undir verðhækkanir, en olía hefur lækkað um meira en helming síðan um mitt ár 2014.