Lögregla í Columbus í Ohio-ríki Bandaríkjanna er nú þegar byrjuð að gera ráðstafanir fyrir opnun nýrrar IKEA-verslunar í borginni sem verður 7. júní. Lögregla hefur lagt til að fyrirtæki í nágrenninu leyfi starfsmönnum að vinna heiman frá fyrstu vikuna eftir að verslunin verður opnuð, vegna mikillar umferðar í kringum verslunina.
Búist er við því að allt að 15.000 manns muni mæta í búðina daglega fyrstu vikuna eftir opnun. Lögregla býst við því að þurfa að loka nokkrum fráreinum af hraðbrautum á svæðinu en í frétt AP er vitnað í umferðarlögreglumanninn Paul Weiner sem segir að það væri aðeins gert í brýnni nauðsyn. Það hefur þó verið gert áður, m.a. vegna fótboltaleikja.