„Við gerum ráð fyrir um 8.400 fermetra byggingu á þessu svæði og að hún muni bæði hýsa World Class-stöð og heilsuhótel. Auk þessa verður starfsemin tengd baðlóni, útisturtum og heitum pottum, gufum og potti sem sérstaklega er hugsaður fyrir sjósund.“ Þessum orðum lýsir Björn Leifsson, stofnandi og eigandi World Class á Íslandi, fyrirætlunum fyrirtækisins innst í Njarðvíkum og í „hjarta Reykjanesbæjar“ eins og hann orðar það. Lóðin sem ætlunin er að taka undir starfsemina er enda á Fitjum, mitt á milli Keflavíkur og Njarðvíkur og steinsnar fyrir ofan starfsemina er vallarsvæðið gamla.
„Það tekur aðeins um fimm mínútur að aka frá þessum stað og út á Keflavíkurflugvöll og því mun þessi uppbygging m.a. nýtast fólki sem er á leið til og frá landinu. Einnig verður þetta kjörinn áfangastaður fyrir þá sem eru í stuttu stoppi á leið sinni yfir hafið.“
Björn bendir á að World Class hafi ekki verið með starfsemi á Reykjanesi til þessa og því sé í raun verið að slá tvær flugur í einu höggi. Uppbyggingin sé einnig framlag til bættrar lýðheilsu á svæðinu.
„Ég tók þátt í útboði á gömlu steypustöðinni sem þarna stendur og er ekki til mikillar prýði. Ég varð hlutskarpastur í því útboði en þá kom bærinn með móttilboð. Bauð mér að jafna hana við jörðu og slétta svæðið en fá þessa lóð í staðinn. Þegar við lögðumst yfir þann möguleika kom hugmyndin að baðlóninu upp og við keyrðum á það.“
Lestu meira um málið í ViðskiptaMogganum í dag.